Глава 74

Глава 74

СКАЗАНИЕ О ПРИХОДE ПОД ЦАРЬСТВУЮЩИЙ ГРАД МОСКВУ
ИС ПОЛЬШИ КОРОЛЕВА СЫНА ЖИКГИМОНТОВА ВЛАДИСЛАВА
СО МНОЖЕСТВОМ ВОИНЬСТВА, С ПОЛЬСКИМИ
И ЛИТОВСКИМИ ЛЮДЬМИ, И С НEМЦЫ, И С ЧЕРКАСЫ,
И С РУСКИМИ ИЗМEННИКИ И С ЫНЫМИ МНОГИМИ

Иже искони ненавидяй добра христианьскому роду враг и сопостат нашь диавол, и еще недоволен бe льстивый, насыщаася крови християньскиа. Оле¹ совeту злому на православную вeру! О, горе и бeда велика! Змий, сверженый от небес, паки злe вооружается на церковь Господню, растерзати ю хотяше и чада ея пожрети, породившихся от нея святым крещениим. Зри умышление окааннаго сего, како не почиет, наглe воюя род нашь попущением Божиим грeх ради наших. Иже древле давый совeт лукавому Навходносору и прегордому Антиоху на святый град Иерусалим, во еже разорити его и потребити от земля имя Господне, и Июдея со Июдою вооружи на Царя славы и Господа нашего Исуса Христа, тойже и нынe вооружается на ны и подходит паки льстивнe и облобызает любовластиа и златолюбия прелестию и гордостию падше велехвальных крестопреступников, Польского короля Жихгимонта, купно же с ним и сына его Владислава со всeми их вельможи и вооружает крeпцe на Московское государство. Король же и иже с ним, вскорe лукавому совeту послeдствуют, дeлу емлются. Посылает вышепомянутого сына своего Владислава на превеликое Московское государство со множеством воиньства Польских и Литовских людей и иных многих орд.

Королевичь же Владислав повелeнием отца своего, поем с собою многое воиньство, прииде во град Смоленеск, и ту собрашася х нему многие воры казаки, измeнники Московского государства. Оттуду же дойде и до царьствующаго града Москвы, многиа крови христианьскиа изливаа. Царьствующему же граду зла ничто же учинити не возмогоша, но паче своих людей множество под стeнами града Москвы положиша.

Владислав же посла полковника своего, пана Чаплинсково со многими Черкасы, к городу Переславлю Залeскому, яко да плeнит его. Пан же Чаплинской, идый от Переславля с Черкасы, и стал в слободe Александровe и умысля с вои своими окрасти изгоном дом Пресвятыя Живоначальныя Троица Сергиев монастырь. И лeта 7127-го (1618 г.), сентября в 24 день, в ночи прииде к Троицкому монастырю в служни и в стрелецкие слободы. Тогда же за городом бышя многие люди: овии на сторожах, а иные во град не внидоша, не чающе прихода его. И сии с ними бой велик учинишя, тако же и из града на помощь изыдошя к ним и Чаплинского из слобод выбили. Чаплинской же, шед с воиньством своим за пруды, повелe село Клеменьтeево и иные запрудные слободы вся огню предати; и поиде под царьствующий град Москву в сход х королевичю. От королевича же паки послан бывает той же полковник Чаплинской с воинствы в Троицкую вотчину, в село в Вохну; и ту той враг Чаплинской от Троицких слуг убиен бысть.

Королевичь же Владислав и иже с ним исполнишяся ярости о убиении его и от царьствующаго града Москвы прииде нощию к Троицкому Сергиеву монастырю. Келарь же Аврамей и воеводы: Семен Ивановичь Жеребцов, да Яков Оксентeевичь Дашков досталные слободы и монастырьские службы повелeша всe выжечь: да не будет под монастырем врагом пристанища. Королевичь же сие видe, ста в селe Троицком в Тураковe, за три поприща от града и восхотe нощию ко граду приступ учинити. В день же недeлный начашя в Троицком монастырe благовeстити ко всенощному. Выходцы же о сем в монастырe повeдашя, яко тогда нападе на них страх велик и ужас. Королевичь же и всe радные паны, яко обезумишяся, со всeми воиньскими людьми всeдошя на кони своя и, яко нeчто чающе на себе, стояще и до свeта вооружены на конех. Заутра же королевичь посла вся полки своя под монастырь, да обьявятся градским людем. Божиею же милостию молитв ради великого чюдотворца Сергиа тогда из наряду з города многих людей побили. Повeдашя же королевичю многие панове: «Мы», – глаголюще, – «о великий нашь государь, стояли под сим муром, под Троицким монастырем, мало не два года с Литовским гетманом с Петром Сапeгою и многих людей потеряли, а монастыря взять не умeли». Королевичь же Владислав по совeту всeх радных панов и всего войска из сельца Туракова отиде в Троицкое же село Сватково, седмь поприщь от града, и по многи дьни ищуще уловити обитель чюдотворца Сергиа и по вся нощи приeжжающе близ монастыря, ожидающе времени, чтобы над монастырем какой промысл учинити. Канцлeр же Лев Сапeга, аки доброхотствуя дому чюдотворца, лицемeрствуя запрети всему воиньству, Троицких сел и деревень жечи не велeл и крестьян не побивати и в полон не имати. Видeв же Премилостивый и Всещедрый Бог нашь лукавое их лицемeрство, яко дом чюдотворца Сергиа лукавым умышлением хотят восхитити, и спусти на них мраз лют и глад велик. Салдаты же их и Нeмцы и многие воиньские люди, аки скот, бродяще по выжженым деревням пища ради и согрeтиа, но нигдe же не обрeтаху; по лeсом же кормов и дров ради ходяще, тии и с коньми мнози измерзаху. И видeшя, яко весь лукавый совeт их не збысться, и мeсяца ноября в 9 день той же канцлeр Лев Сапeга прислал в Троицкой Сергиев монастырь с возничим своим Шимком мeстной образ великого чюдотворца Николы Можайского, да Симанова монастыря старца Иону Трегубова, а сказал возница ево Шимка, что «тот образ взял немчин, съeхав з дороги, а старца взяли на дороги не доходя села Клементиева, и Лев тот образ и старца послал к вам». На завтрeе же того дьни Лев Сопeга прислал в монастырь дву крестьян монастырьских, Ромашка да Илейку деревни Селкова, а в грамотe писал х келарю Аврамью и к воеводам, что подъeщики их взяли двух крестьянинов, чаа их лазутчиков. «И мы де тeх дву крестьян к вам послали и въпередь своим воиньским людем заказали, сел ваших жечь и крестьян побивать и в полон имати не велeли. А вам бы наших воиньских людей побивати и в полон имати не велeти».

И мeсяца ноября в 15 день Лев Сопeга и радные паны с посланником своим писали в монастырь х келарю и воеводам, что бы посланников их пропустити к Москвe к государевым царевым и великого князя Михаила Феодоровича всея Русии к великим послам Федору Ивановичю Шереметеву с товарищи для мирново поставлениа. – А будет де вы наших посланников без государева указу пропустить не смeете, и вам бы к государевым послом Федору Ивановичю Шереметеву с товарыщи нашь посольской лист послати не замотчав².