Слово святаго Иоанна Дамаскина на Успение Пресвятыя Богородицы

СЛОВО

СВЯТАГО ИОАННА ДАМАСКИНА
НА УСПЕНИЕ ПРЕСВЯТЫЯ БОГОРОДИЦЫ

     Обычай есть, кто к чему любительно расположен, на языкe всегда то носить, и в мысли, днем и нощию воображать. Аз же любовию горя к Матери Христа Господа, сие похвальное слово ей сотворю; не для того аки бы что мог ей даровать; но да самому себe, и вам присутствующим. О Божественное и священное собрание! предложу пищу душеполезную и спасительную, и священной сей нощи пристойную, духовную корысть чрез то приобрeтая.

Ибо, как видите, мирских яствий у нас есть недостаток. Чего ради, каковой ни есть, нáскоро пир приуготовляю: хотя малоцeнный, ниже сходный с богатством днесь созвавшия нас: однако глад по нуждe утолить могущий. Ибо Она не имeет нужды в наших похвалах: но мы паче в славe от Нея происходящей имeем нужду. Прославленное бо како прославленно быти может? Источник свeта како просвeтится? Но мы таковым дeлом самим себe соплетаем вeнец. Живу бо Аз, глаголет Господь, яко прославляющих Мя прославлю (1 Цар. гл. 2, ст. 30).

     Что есть сладчае Матери Господа моего? Она плeнила мою мысль. Она восхитила язык. Сию и явe и во снe воображаю. Она есть Слова Матерь: и слово мнe доставляет. Она порождение неплодныя Матери, и безплодныя дýши творит плодоносными. Сея священное и Божественное преставление празднуем днесь.

     Приидите убо; взыдем к таинственной горe: и поднявшись выше мирских и тeлесных видов, и взошедши во облак божественный и непостижимый, и быв в свeтe Божием, безконечную воспоем силу. Каким образом Единородный Сын Божий, по принятии плоти и по страдании, возвратился паки ко Отцу, и Свою по плоти Матерь к Своему Родителю привлек, и яже сама бысть земное небо, на небесную землю Ее преселил.

     Днесь мысленная лeствица и одушевленная, ею же сшед Вышний на земли явися и с человeки поживе, употребив вмeсто лeствицы смерть, от земли на небеса прешла. Днесь земная трапеза, небесный жизни хлeб, угль Божества неискусобрачно носившая, от земли вознеслася на небеса. И для сущей на востокe Божией двери, небесныя двери отверзлися. Днесь из земнаго Иерусалима град Божий одушевленный к вышнему Иерусалиму прелагается: и Перворожденнаго всея твари, Единороднаго из Отца, Перворожденнаго от себя и Единороднаго носившая, в церкви первородных водворяется; и кивот Господень одушевленный и разумный в покой сыновний преносится. Двери райския отверзаются, и Богоносную приемлют ниву, из неяже произрасшее вeчныя жизни древо, разрушило преслушание Еввино, и умерщвление Адамово. Ковчег Божественнаго Слова воплощения, во гробe, яко в пресвeтлом чертогe опочивает, и из него в небесный восходит невeстник, имeя откровенно царствовать с Сыном и Богом: а гроб, вмeсто чертога, на земли оставляет.

Так уже ли гроб есть чертог? Так по истиннe; чертога всякаго блистательнeе, не блистанием злата, ни ясностию сребра, ни драгоцeнных камней сверканием сияющий, ни драгими и златотканными одеждами преукрашенный: но Божественным блистанием Всесвятаго Духа: не тeлес совокупление земным любовникам, но связанным с Духом Божиим, жизнь Святых душ подающий.

Сей гроб есть едема благообразнeе. Едем смерть причинил: а гроб сей от земли тeло смертное вознес на небо. Едем с высоты на землю родоначальника нашего свел; ибо в нем по образу Божию созданный на сей осужден приговор: земля еси, и в землю пойдеши (Быт. гл. 3, ст. 19). Сей гроб древния скинии есть почтеннeе, яко вмeстил в себe разумный и одушевленный и Боговозженный свeтильник, и живоносную трапезу, содержащую не хлeбы предложения, но небесный; не огнь вещественный, но невещественный огнь Божества. Сей гроб есть щастливeе Моисеева кивота, получив в жребий, не сeни и проображения, но самую истинну. Вмeстил бо в себe прямую и златовидную стамну, яже небесную манну произнесла, и скрижаль одушевленную, вмeстившую Слово Божие, перстом всепривлекательнаго Духа воплотитися имущее, Слово ипостасное; и кадильницу златую, яже родила Божественный угль, и всю тварь благоухания исполнила.

     Да бeгают демоны, якоже древле Египтяны: мы же Матери Господней да воспоем пeснь исходную. Церковь, яко Мариам, да возмет в руки тимпан, и да начнем пeснь празнственную. Да изыдут духовнаго Израиля отроковицы с тимпаны и лики восклицающе. Цари земные и судии со властелины, юноши и дeвы, старцы с младенцы, Матерь Господню да воспeвают; соборы и словà всякаго рода, и народов и людей различные языки, пeснь новую да составят. Да огласится воздух духовными цeвницами и трубами, и огненными сияниями сей день спасительный да открывает.

     Взыграйте вы овны избраннаго Божия стада, Божественные Апостолы, яко горы высокия и превознесенныя, на высоту высочайшими Богомыслиями подымаяся; и вы агнцы Божии, народ Святый, церкви питомцы, яко овны на высокия горы, произволением простирайтеся. Да уготовается облак преукрашенный, и крылы вeтров, от конец земли, в Сион Апостолов принесите. Вси языцы да восплещут руками. Ангелы смертному да послужат тeлу. Дщери Иерусалимския Царицe да послeдуют; и яко близь Ея дeвы обновляяся духом к жениху соберитеся, представ одесную Владыки.

Сниди, сниди, Владыка! и Матери должную за воспитание воздаждь награду. Божественныя простри руки принять душу Матернюю: в Отеческия руки предавый Дух Свой на крестe, возгласи к Ней сладкий привeт: прииди красная, ближняя Моя, красотою дeвства паче солнца сияющая. Ты сообщила Мнe свое: прииди, Моим насладися. Прииди Матерь к Сыну: прииди, царствуй вкупe с сущим из Тебe, с Тобою нищетствовавшим.

Пойди, Владычице, пойди не якоже Моисей, взойди и умри: но паче умри; и тако взойди. Душу предай в руки Сына Твоего. Отдай земное земли; яко и сие с Тобою взято будет.

     Шествию Божия скинии да предшествуют Ангели, и гроб да изготовят. Да приуготовится миро, и да помажется им всечистое и всеблагоуханное тeло. Да радуется земля положением тeла. Да скачет воздух восхождением духа. Да дышат вeтры росоносные и благоприятные. Вся тварь да празднует о восхождении Матери Господни. Лики юношей да восклицают. Да витийствуют языки витий похвалами. Сердца мудрых о чудеси да философствуют. Старцы, сeдиной почтенные, внимательно Богозрeния да приносят. Вся тварь да соберет все возможное: но и таковым образом и до малeйшей части достоинства не достигнет.

Приидите, вси мысленно со отходящею пойдем. Приидите, вси сердца желанием со снисходящею во гроб сойдем. Обступим священнeйший одр: пeсни священныя воспоем, тако пeснопоюще: радуйся Благодатная: Господь с тобою. Радуйся предуставленная Матерь Господа: радуйся избранная прежде вeков совeтом Божиим: земли Божественнeйшее произращение: огня Божественнаго обиталище: Духа Святаго священнeйшее изображение: воды живыя источник: рай древа жизни: Божественныя кисти вeтвь одушевленная, небесное питие источающая: рeка исполненная аромат духа: нива Божественнаго класа: роза дeвством знаменитeйшая, и испускающая благоухание благодати: крин царския одежды: агница родившая агнца Божия, вземлющаго грeхи мира: спасения нашего дeлателище: Ангельских вышшая сил: раба и мать.

Приидите; обступим гроб чистeйший, и Божественную почерпнем благодать. Приидите, душевными объятиями приснодeвственное тeло понесем, и взойдем внутрь гроба, и вкупe с Нeю умрем, удаляя себя от страстей тeлесных, да и поживем с Нею жизнию безстрастною и непорочною. Послушаем Божественных пeсней, из невещественных Ангельских уст происходящих. Взойдем поклонитися, и познаем странное таинство, каковым образом Она взошла, како вознеслася, како на небо принята, како Сыну предстоит выше всeх Ангельских чинов. Нeт никакова раздeления между Материю и Сыном.

Сие тебe исходное слово творю, Матерь Господня! по благоговeнию и усердию ко Святeй Троице, Ей же послужила Ты, по благоволению Отца и по силe Духа, приняв безначальное слово, всемогущую Божию премудрость и силу. Приими убо усердие, силы мои превосходящее, и даждь спасение, страстей душевных отчуждение, болeзней тeлесных облегчение, затруднений рeшение, жизни спокойное состояние, просвeщение духа, к Сыну своему желание возжги; благоугодну Ему жизнь нашу представь, яко да и тамо получив блаженство, и зря Тебе, Сына Твоего славою блистающую, пeсни священныя возшлем, вeчно веселяся, в церкви празднующих, достойно духа; чрез Тебе спасение наше устроившему Христу, сыну Божию и Богу нашему, Ему же слава и держава, со безначальным Отцем, и со всесвятым и животворящим Духом, нынe и присно и во вся безконечныя вeки вeков. Аминь.

Выбрано из Слова С. Дамаскина на Успение Богородицы. Издания Парижскаго, 1712 года, на листe 882.

Говорено в Троицкой Лаврe на утрени.